K L S W 遊記: 夏之北海道(七)

日期 ﹕七月十日(下午)至十一日(上午)
行程 ﹕=> 阿寒湖 => 屈斜路湖 => 硫磺山 => 川湯溫泉 => 摩周湖

食完飯之後，我哋就向道東三湖出發。道東三湖係指喺阿寒國立公園範圍內嘅阿寒湖、屈斜路湖及摩周湖。當中阿寒湖較為出名同受港人歡迎。

尤其喺國產電影非誠勿擾播映之後，該區更成為國內同胞嘅旅遊熱點。

首站，我哋先去阿寒湖。一路上，仍然好似今朝咁大雨，而且愈行愈大霧。睇嚟，今日嘅行程唔多順利。

去到阿寒湖觀光船碼頭，得好少人，好静。望出去個湖度，天色昏暗，能見度亦唔高。見到呢個景象，好難幻想D人讚阿寒湖嘅景色好靚。我哋冒雨影咗幾張相就即刻返上車。

由於唔心息，決定沿住湖邊揸車望下。去到第二個觀景點，景觀都係差唔多。

我哋終於放棄，起程去下個景點—屈斜路湖嘅秘湯。沿途仍舊係有雨+大霧。突然間，見到好似有個湖喺右手邊，約隱約現。跟住，見到有個雙湖台觀景台嘅路牌，我哋馬上駛架車入去睇下。泊低架車後，我哋沿指示牌行上斜坡去到觀景台。喺霧中見到有一個湖喺山林間，有D騰雲駕霧嘅感覺，好神秘。

雖然冒住大風大雨嚟睇，都係值得。

揸多一陣車，我哋就到咗秘湯，佢係一個喺屈斜路湖邊嘅天然露天風呂。當我哋到達秘湯嘅時候，雨大致都停咗，但個天依然係烏雲密佈，睇唔到日落，仲幾凍，好彩冇諗過浸秘湯。

其實個秘湯嘅位置真係唔錯，喺正個湖邊，望出去海天一色，有置身喺湖中嘅感覺。

老實講，個秘湯已經一D都唔"秘密"，因為連Google map上面都可以揾到佢嘅標記。雖然今日落住雨，天氣唔太好，但我哋到達嘅時候，就遇到四個日本男人啱啱浸完離開。相信好天會有更多人浸。

跟住，我哋就再沿住湖邊，向下一個目的地—沙湯—進發。同秘湯一樣，沙湯都係喺屈斜路湖邊嘅天然温泉，不過如果想浸沙湯，就要花D功夫，自己喺沙灘上挖個洞先可以浸。當你喺沙灘上面一路挖，就會見到沙中間有D水滲出，初初可能會以為呢D係普通嘅湖水，因為個沙灘就喺個湖邊。但其實D水係暖暖嘅温泉水，感覺好神奇。

好多人一家大細，帶埋帳幕喺度露營、燒烤同浸温泉。真係一個唔錯嘅家庭活動。

由於今日無日落睇，可以早D離開屈斜路湖，我哋就去埋附近嘅硫磺山參觀。未到硫磺山，喺遠處已經見到有個山谷喺度冒煙，駛得愈近，啲硫磺味就愈濃烈。

去到硫磺山，原本個停車場係要收費，但由於職員經已放工，我哋連泊車錢都慳返。其實硫磺山係屈斜路湖同摩周湖一帶嘅一座活火山，我哋可以近距離觀看個硫磺火山口。不過所謂火山口，我哋只係見到幾個黃色嘅洞喺度噴D煙出嚟，一D都唔覺係火山。

參觀完硫磺山，我哋就返酒店。今晚住嘅係川湯溫泉區嘅一間傳統温泉旅館，D房間同浴場都有D舊，同網上book嗰時見到嘅感覺唔係好同。不過啲職員嘅服務好好，好友善。

今晚嘅晚餐係喺酒店食日式料理，職員會事先問你想幾點食。我哋準時去到宴會室，見到門口已經企咗三位職員笑容滿面咁迎接緊客人。宴會室係一間約二千呎嘅日式房間，裏面只放咗四張枱。

個日式料理嘅菜式好standard，味道都OK。但因為要坐喺tatami上面，成晚隻腳蹺嚟蹺去，坐得好辛苦。

當晚再享受個川湯溫泉後就休息。第二朝，我哋就起程到摩周湖。今日天氣好D，無落雨，只係多雲。

其實，摩周湖除咗(曾經)係全世界水質最清澈嘅湖外，佢亦係一個出名神秘嘅湖。因為佢好多時間都係俾大霧包圍，睇唔到個湖面。

而我哋今次就體驗到佢神秘嘅一面。摩周湖嘅觀景台係喺山腰上面，當我哋一路駛上山，D霧就愈嚟愈大。當到達觀景台後，唔好話要分個湖係喺邊個方向，我哋連前面有D乜都睇唔真。唯有影兩張相就離開。