夏之北海道(六) - 釧路和商市場

日期 ﹕七月十日(上午)
行程 ﹕=> 釧路和商市場

一朝早，就由帶廣揸車向釧路和商市場出發。今日開始，北海道嘅天氣變差，一路揸車都落住大雨。好彩第一站係室內嘅漁市場，期望晏D去阿寒嘅時候，天氣會好番D啦。





一去到和商市場，我哋周圍逛下、睇下嘢先再食我哋嘅早餐+午餐。個市場有好多嘢賣，有乾貨、濕貨賣，亦有食堂。嗰度唔算好大，但環境好乾淨。

好...視察一輪之後，我哋就開始揀選今次嚟和商市場嘅主要目標-花咲蟹。又係喺和味無窮度見到，主持人喺個水池度揀咗一大隻花咲蟹上嚟，都只賣六千円，好抵。食嘅時候，Ricky san仲要講咗句，花咲蟹係北海道四種蟹裏面最有蟹味嘅。就係咁，我哋決定到北海道一定要試呢種蟹。

終於，我哋揀咗呢一間叫嶋田商店買花咲蟹。佢水池裏面嘅活花咲蟹比較多，而且價錢都OK。我哋揀好蟹之後，佢即刻幫我哋蒸，二十分鐘後就有得食。

其實和商市場係一個出名嘅海鮮市場，而當中勝手丼係佢最具特色嘅。勝手丼其實相等於車仔海鮮飯，買咗一個白飯之後，你就可以去到唔同嘅攤檔度，揀你鍾意嘅餸，各類海鮮、刺身都有。

買咗飯之後，我哋兩個分別去揀自己鍾意嘅餸，但由於我哋喜歡嘅食物都差唔多，我哋決定試下喺兩間唔同嘅舖度揀餸。

最後，我哋總共揀咗牡丹蝦、帆立貝、海膽、大拖羅、魚子同蟹柳。食完之後，覺得D材料尚算新鮮，但D味道就無乜特別。當中大拖羅同蟹柳較失望。(因為事前有D期望。) 感覺上，唔需要喺北海道都一樣食到呢種水準，而且勝手丼嘅價錢又唔算好平。

好.... 跟住就到隻花咲蟹。間店舖會將隻蟹蒸好再放入個膠兜，送到嚟我哋個位度。未蒸之前，隻蟹係深紅色嘅，熟咗之後會變成較淺色嘅橙紅色。隻蟹嘅腹部有好多蟹子，初初我哋有D擔心有咁多蟹子會唔會影響隻蟹嘅肉質同味道。後來發現，原來一大部份嘅花咲蟹都係有蟹子。可能係由於夏季係佢嘅繁殖期，而捉到嘅雌蟹比較多，所以有蟹子都係好正常。

開始食隻蟹，一打開個蓋，即刻有好多蟹汁溜出嚟，到開咗個蓋，上面仲有少少汁留係度。D汁好鲜甜、有好濃嘅蟹味。個蓋上面都有少量嘅蟹羔，味道都OK。

跟住食D蟹肉，每隻蟹腳中間都留有一層蛋白，D肉又嫩又鮮。感覺上好似我哋以前喺香港某間海鮮店食嘅花雕蒸蟹，不過呢度D蛋白完全係由D蟹汁形成，更有蟹味。而D肉要比花蟹嘅肉更嫩同更有蟹味，好正。

雖然唔敢講花咲蟹係北海道四種蟹之中最好食，但係今次呢隻蟹真係令我哋留下深刻印象。如果有機會喺夏天嚟北海道，一定一定要試下食即蒸嘅新鮮花咲蟹，包你一試難忘。原本我哋打算留番半隻蟹打包，等晏D再食，費事食得太飽。但最终我哋都忍唔住，食哂成隻蟹。

食完飯之後，我哋再買咗半個夕張蜜瓜同一個水蜜桃試下。個蜜瓜當然好味，而個水蜜桃亦好好食，未去皮已經聞到好香嘅桃味，去咗皮之後更加香到不得了，食落去超多汁、好清甜。

(後記 : 近排我哋係美食展見到有花咲蟹賣，二話不說就買咗隻返嚟食。點知一食落去，D蟹肉經過冷藏之後，肉質變得較嚡，味道亦無咁鮮味。而且，冷凍嘅蟹亦無剛蒸熟嘅蟹嗰D好味嘅蟹汁同蛋白。完全係兩回事。)

上一篇 : 夏之北海道(五) - 帶廣
下一篇 : 夏之北海道(七) - 道東三湖