夏之北海道(九) - 帶廣豚丼

日期 ﹕七月十一日 (下午)
行程 ﹕=> 帶廣

食完飯之後，我哋再次向帶廣進發。沿住釧路嘅海岸線行駛，風景唔錯。可惜揸緊車，唔可以影番兩張相。返到帶廣市嘅外圍，見到有間大形嘅家居用品超市，我哋即刻泊低架車入去逛下。裏面好大，有好多種貨品。




離開超市嘅時候，喺停車場見到隔離架車入面有隻狗，都幾可愛。

由於今次到達帶廣嘅時候較早，我哋終於可以試下帶廣嘅名物 ~ 豚丼。而且，一試就試兩間 ︰ 元祖 豚丼のぱんちょう、豚丼のぶたはげ。

我哋先去元祖豚丼，每人叫咗一份細豚丼。

一打開個碗蓋，已經聞到好香嘅烤肉味，裏面有四、五塊豬肉。一咬落去，塊豬肉好嫩，仲要有肉汁，再配合埋肉上面嘅醬汁，好得，好好味，不愧為元祖豚丼!

食完呢餐由於太飽，我哋決定喺火車站入面嘅商店行下至試第二間豚丼。點知我哋見到有軟雪糕食，又忍唔住買嚟食。我哋叫咗個扭紋雪糕嚟試下。

呢間嘅軟雪糕都好好食，D朱古力雪糕入面仲有D碎粒喺度，更加好食。

跟住終於去食火車站入面嘅豚丼のぶたはげ，我哋兩個人叫咗一份嚟試。D豬肉都燒得好香，而D調味較重，帶很重嘅黑椒味。感覺上，元祖豚丼嘅豬肉烤得比較嫩，而且食完冇咁口渴。我哋亦比較鍾意元祖豚丼嘅調味多D。

其實到帶廣除咗係要試有名嘅豚丼外，仲想試下六花亭總店當店限定嘅サクサクパイ，係一隻中間有custard嘅批。原本諗住喺佢關店前到達實無問題，點知二樓嘅喫茶處比較早收，我哋到達嘅時候已經收咗。無機會試下呢種甜品，覺得好失望。

不過見到六花亭總店，真係好有氣派，廚窗佈置得好靚，而個舖面就好似酒店大堂一樣。當去參觀下都抵。

上一篇 : 夏之北海道(八) - 釧路濕原
下一篇 : 夏之北海道(十) - 美瑛