行程 ﹕=> 富良野 => 美瑛 => 富良野
買完蜜瓜後就去我哋今日參觀嘅第一站 ~ 芝士工房。
一去到即刻去一樓嘅食品部。見到有三款芝士提供試食﹕Sepia，Maisons de Pierre，Wine Cheddar，不過D味道唔太啱我哋。
跟住，終於見到今日的主角 ~ 富良野牛奶同芝士蛋糕,價錢比旅遊書寫嘅貴咗小小。除咗呢兩款,我哋仲買咗芝士撻、芝士批同蘋果汁。
呢度有個小小嘅休息區俾你坐低慢慢食,仲有個靚view俾你望住出面睇景,唔錯唔錯。
支牛奶真係好好味,好香嘅奶味。其實我哋沿路都有喺超市同便利店買盒裝牛奶,味道已經比香港買嘅曰本牛奶好啲同平啲,但係點都唔夠呢度嘅富良野牛奶咁香咁濃。如果鍾意飲牛奶嘅朋友們,不妨飲多幾支,事關唔係度度有得買,我哋之後都淨係喺富田農場見過(不過貴小小)。跟住就試呢度好出名嘅芝士蛋糕,一咬落去好鬆軟,滲出淡淡嘅芝士味,真係好好味。另外個芝士撻同芝士批都幾好味,係"漏"咗小小。
攻陷完呢堆甜品，就要試下另一個必試嘅甜品 ~ 雪糕! 有牛奶、南瓜、粟米味等等。我哋要咗牛奶同粟米味，牛奶雪糕依然香滑，粟米味就普普通通。食完啲甜品都飽咗七八成，連午餐都慳番食唔落!
下一站開始，我哋會進入美瑛嘅範圍。我哋會揸車沿Paramonic Road參觀，然後再到Patchwork Road。沿路經過早幾日買生白粟米嘅地方，走去買多支粟米食，一樣咁好味。
到咗Paramonic Road，首先到美馬牛小學[Mapcode: 349 730 066]睇下。其實近距離望，真係無乜特別，相信要好似D明信片咁，遠距離咁影至靚。
跟住，我哋就到拓真館[Mapcode: 349 704 305]睇下攝影大師前田真三嘅相展。呢個展覽係免費入場，裏面除咗有前田真三嘅攝影作品外，仲有佢個仔前田晃嘅作品，啲相嘅構圖同意境都好好，值得去睇一睇。不過館內係禁止拍照，唔可以影相留念。
之後去咗展望台 ~ 千代田之丘[Mapcode: 349 734 462]睇景。唔知點解個展望台居然一個人都冇，初時仲以為去錯咗地方!!其實從展望台望出去嘅景色都幾靚，一片片綠油油嘅稻草田，美中不足嘅係成日落住雨，冇太陽。
離開咗千代田之丘，美瑛沿途嘅風景都好靚，我哋隨便喺路邊停車影下相。
雖然個肚仲好"頂"，但係點都要到三愛之丘茶屋[Mapcode: 349 792 477]tea一tea，呢間茶屋係由一對夫婦經營。外面落緊雨，我哋揀咗坐室內嘅bar枱，前面有個大窗，坐係度就可以透過大窗見到出面嘅稻田景色。我哋嗌咗個咖啡雪糕試，果然如其他blog友寫嘅一樣，好好味，雪糕軟滑，咖啡香濃。老板娘好有心思，特登攞支有笑樣嘅匙羹俾我哋用。老板娘仲好友善咁叫我哋隨便參觀出面嘅薰衣草原。如果下次有機會嚟開呢頭，一定再嚟幫襯。
Tea完後就出發去阿斗夢之丘[Mapcode: 389 071 595]。一落車就覺得有啲凍，點知越行上去就越凍。雖然呢個花田比較細，但係起碼今次見到薰衣草，好過之前跟團去嘅四季彩之丘。不過如果同之後去嘅花田比較，阿斗夢之丘嘅花就唔算好靚。我哋逗留咗一陣就走。
跟住我哋去睇呢度必去嘅"Ken&Mary之木"[Mapcode: 389 071 670]同"親子之木"[Mapcode: 389 098 482]，係車度參觀同影相真係舒服，郁都唔駛郁，就算落雨天都無問題。
終於到咗食晚飯嘅時間，今次我哋會試下喺香港都食過嘅山頭火喺美瑛嘅分店。
我哋嗌咗餃子定食同鹽味叉燒拉麵。之前喺札幌嘅味之時計台食嘅味噌拉麵已經覺得好好食，而山頭火嘅鹽味拉麵亦都好好食，D湯清，麵又爽口，而舊叉燒好鬆軟、好淋。最估唔到係佢嘅餃子都好出色，皮薄餡靚，煎得又香口，好食過味之時計台嘅餃子好多。
由於今次行程去唔到旭川，唔可以試下佢總店嘅味道，但我哋對美瑛分店嘅水準已經好滿意，至少比香港分店嘅水準高好多。
食完飯就去今日最後一個景點 ~ 葡萄酒工場[Mapcode: 349 060 759]。嚟呢度唔係為品嘗葡萄酒，而係嚟睇佢出面嗰個薰衣草小山岳。係夏天嘅夜晚，工場會為薰衣草園亮燈，同日頭睇薰衣草嘅感覺好唔同。完成呢個景點後就返咗附近嘅民宿休息。
上一篇 : 北海道之旅(九) - 帶廣豚丼
下一篇 : 北海道之旅(十一) - 富良野
沒有留言:
發佈留言