日期 ﹕七月七日至九日
行程 ﹕小樽 (運河、音樂盒館、北一硝子館) => 札幌 (白之戀人、神宮、薄野、Rera Outlet)
嚟到小樽，首先我哋到運河邊睇日落。由於時間尚早，未有日落睇，影咗兩張相就要返酒店。
返到酒店房，原來係向海。近黃昏，窗外景色唔錯，景觀幾靚。
之後即刻到餐廳食晚餐，係西式自助餐。個自助餐質素唔錯，幾味菜式都幾好味。當中我哋最欣賞嘅竟然係兩個湯，一個係蟹湯、一個係雜錦湯(即係唔知係乜)，食得出裏面有味噌、豬肚同蘿蔔，煮得好入味。
當睌有世界盃四強賽事，半夜起身睇咗陣，但可惜我太眼訓，所以都係再訓過。第二朝，我哋食完個早餐就再出發，個早餐都OK。
今日嘅第一個節目係喺小樽市中心參觀 : 音樂盒館、北一硝子館、玻璃工作室 ...
但我哋一睇完音樂盒，就即刻走咗去揾嘢食，試下出名嘅食物 - LeTAO嘅雙層芝士蛋糕同好多網友超讚嘅燒帆立貝。
呢間舖頭嘅燒帆立貝果然好好味，燒得好香、好鮮甜。而佢嘅燒蟹腳亦整得唔錯，同樣美味。個哥哥仔仲好好人咁，送多一客燒蟹腳俾我哋，不過D味道明顯無我哋買嗰客咁好味。
之後再行下，食埋個六色雪糕，就離開小樽返札幌。
食完午餐之後去咗白之戀人參觀。嗰度都幾大，整得幾靚。參觀完朱古力嘅歷史同製作過程之後，我哋就喺周圍影下相。
跟住就到神宮參觀。雖然嗰度細細哋無乜特別，但附近環境唔錯，幾舒服。
觀光嘅行程完咗之後，就到喺札幌購物嘅時間，亦都係D團友最期待嘅節目。去到百貨公司唔同嘅樓層，都會遇見D團友。去到agnes b嘅時候，直頭見到一個導遊帶住成團台灣人嚟買嘢，好踴躍。而我哋自己都有少少收獲。
買完嘢再到薄野，到拉麵橫丁參觀下，同去紅燈區睇下。
之後又夠鐘去食團餐喇。
第二日係個旅行團嘅最後一日，去機場之前，大家有三個鐘頭時間喺Rera Outlet度shopping。呢個outlet幾好行，D店舖同款式幾適合香港人，比其他地方嘅outlet吸引得多。三個鐘嘅時間，都唔係好夠我哋逛街同買嘢，最後勉強都叫做行完，總算有D收獲。
跟住，個團就要去機場，準備離開北海道。而我哋就要同D團友講再見，喺機場攞車向帶廣出發。
總結成個跟團嘅行程，我哋尚算滿意，尤其係酒店住宿方面。除咗係食物有D令我哋失望，喺蟹御殿場嗰餐幾呃錢外，個團都尚算OK，無話強逼購物。咁間旅行社同個導遊都要搵食，我哋覺得算係咁啦。另外值得一提嘅係，個導遊嗰把口好得，每個車程都無訓覺位。除非佢收聲，否則都令我哋笑唔停，真係幾得。就算喺蟹御殿場俾佢坤完，我哋都無乜反感，好犀利。
上一篇 : 夏之北海道(三) - 美瑛/富良野 (跟團)
下一篇 : 夏之北海道(五) - 帶廣
沒有留言:
發佈留言