今次因為某D原因，終於決定去北海道。Plan咗12日嘅行程，7月4日至15日，5日跟團，7日自駕遊。
機票方面，雖然今次有跟團，但係因為國泰團體機票最多只可以逗留8日，唔可以再extend，我哋唯有自購機票。因為係旺季，直航機票又貴又難攞，我哋又唔想等waiting，結果我哋揀咗大韓嘅機票。零晨起飛，要係首爾等5個鐘再轉機去北海道，等待嘅過程都幾漫長。
飲食方面，本來跟得團，就預咗啲食物好普通。但係去北海道喎，仲要間旅行社嘅日本團都幾出名，點都有D期望。結果除咗幾晚由酒店提供嘅自助餐好啲外，D團餐真係好唔得吓。仲以為跟間比較出名嘅會好D添。原來真係有期望，先至會有失望。
不過住宿方面就真係唔錯，我哋都幾滿意。後來自駕遊嘅時候發現，原來北海道嘅住宿普遍質素唔錯，性價比十分高。
講到今次旅程最難忘嘅，一定係北海道嘅食物﹕馬糞海膽、夕張蜜瓜、花咲蟹都一試難忘。
其他食物、小食、零食都好得，拉麵、天婦羅、燒帆立貝、芝士蛋糕、雪糕、白粟米、水蜜桃、富良野牛奶都好好味，攪到我哋好想即刻再返去食過。
觀光方面，重點係去睇薰衣草。之前去法國普羅旺斯睇唔到，今次去北海道睇返夠本。富良野同美瑛有好多薰衣草田、花田、麥田等自然景色，用一兩日時間參觀根本唔夠。
另外值得一提嘅係釧路濕原，嗰度嘅景色令我哋有啲驚喜，十分怡人、舒服。由於本來無乜期望，所以預留遊覧嘅時間唔係好夠，有D可惜。
總結今次嘅行程，我哋都好滿意。原本有D擔心今年遲開花，睇唔到薰衣草，結果都無問題(註:跟團嗰日真係睇唔到)。又食到想食嘅北海道名產，而且當中好多個都為我哋帶嚟驚喜。
我哋覺得北海道係一個可以成日去嘅旅遊地方，夏天可以食嘢、睇花，冬天可以滑雪、賞雪。唯一可惜嘅係，我哋最鍾意嘅食物全部都要夏天先有得食，馬糞海膽、夕張蜜瓜、花咲蟹全部都係夏天嘅特產。要等足一年先可以再食，實在好可惜。真係好想下個月即刻再去北海道食過。
下一篇 : 夏之北海道(一) - 札幌
沒有留言:
發佈留言