日期: 2010年12月24日
地點: 尖沙咀廣東道 - 西班牙餐廳Fandango
今晚平安夜,同老婆去咗尖沙咀一間西班牙餐廳Fandango食晚餐。揀呢間餐廳食嘅主要原因,係因為我哋之前嚟食過,覺得佢嘅幾款tapas都好好食,令到我哋好想再試下佢其他嘅菜式。
而揀平安夜嚟嘅原因,係今晚周圍都好多人,我哋又唔想同人逼,諗住西班牙餐廳會少D人,會係個唔錯嘅選擇。
雖然今晚餐廳有安排平安夜嘅menu,但我哋仍然可以order menu上面嘅a la carte菜式。經過一輪嘅選擇,我哋發現我哋想要試嘅菜式,都已經包咗喺個平安夜menu裏面。所以我哋就order咗兩份set dinner。
|
*** Sangria ***
** Bread *** |
個set menu有埋紅酒,但我哋要求轉做sangria。自從上次去完西班牙之後,我哋就鍾意咗飲sangria。喺香港好難飲到好味嘅sangria(其實都好睇個人口味),之前喺香港同埋澳門試過幾間西班牙、葡萄牙餐廳都係覺得麻麻哋。
呢間嘅sangria上次嚟飲過,覺得普普通通。但今次嘅味道明顯同上次唔同,果汁嘅比例好似少咗,選用嘅酒易入口D。整體上覺得好飲咗。不過杯酒入面就無咗D果肉果皮,飲落有D唔慣。而跟餐送嘅麵包就好普通,無乜特別。 |
|
*** Iberico Ham 5J *** |
個set包咗五款tapas,而第一道小食係西班牙火腿,碟火腿一放到我哋面前就即刻聞到好香嘅火腿香味。每片火腿肥瘦都好適中,放入口咬感唔錯,愈咬愈覺得甘香,好好味。好少食到D咁好食嘅火腿。
平時食開嘅斑馬火腿,會同蜜瓜一齊食,火腿較咸,配合甜嘅蜜瓜,味道會好夾,但唔係好食得真D火腿嘅味道。而呢隻嘅咸度適中,就咁食都好好食。 |
|
*** Deep Fried Prawn with Romescu Sauce ***
*** Grilled Scallop with Slow Cooked Pork Belly *** |
第二道小食係炸蝦串。D蝦炸得啱啱好,外層乾爽,不過蝦味唔重。點埋杯醬汁,味道都唔錯。但係同其他四款小食比較,算係較遜色嘅一款。
第三道小食係煎帶子配豬腩肉。首先我哋試下個帶子,雖然D帶子係急凍嘅,但係煎得幾好食,不但無雪味,而且仲幾鮮甜。但係令我哋最驚喜嘅,反而係帶子下面嗰塊半肥瘦豬腩肉。好"林"、好入味,感覺有D似梅菜扣肉,好好食。 |
|
*** Stuffed Anchovies ***
*** Roasted Suckling Pig in "Segovia" Way *** |
第四道小食係炸沙甸魚沙律。道菜將條魚開邊加粉攞去炸。我個人覺得開咗邊比原條煮好食D,放入口嘅時候,份量同口感都啱啱好。條魚本身好鮮味,炸完之後D肉都仲係好嫩,好好食。連我老婆平時唔食沙甸魚都話好食。
最後一款小食,係Segovia式燒豬仔。呢道菜最大嘅特色,係燒得好香脆嘅豬皮。之前去西班牙,我哋專登去咗Segovia間老店試呢一道菜。當時覺得唔好食,佢嘅豬皮硬而不脆,D肉亦煮得都好普通。
不過今晚反而有驚喜,隻豬燒得好香好脆,而D肉亦都保留到肉汁,真係色香味俱全。比我哋上一次嚟呢間時食嘅更好食! |
|
*** Wild Mushroom and Truffle Soup ***
*** Blood Orange Sorbet *** |
個餐原本可以揀沙律或者餐湯,但我哋兩個都order咗湯。個餐湯係黑菘露磨菇湯,佢個賣相有D似杯咖啡。個湯一送到嚟,即刻聞到好香嘅黑松露味。雖然我哋已經有D飽飽哋,但都即刻覺得食慾大增。撥開面層嘅mousse,見到下面嘅蘑菇蓉。D蘑菇好香,飲落啲味道好濃郁,撈埋D mousse飲,好滑好好飲。
食完小食、飲完湯,跟完嚟咗杯sorbet。其實我哋唔係咁鍾意D好酸嘅sorbet,但係呢杯berry味嘅sorbet唔係好酸,有D似思樂冰,好醒胃醒神,好啱我哋口味。 |
|
*** Baked Sea-bass Stuffed with Chanterelle and Ham *** |
到主菜,我哋要咗焗鱸魚同埋西班牙海鮮飯。個焗魚用咗塊鱸魚夾住一塊薄嘅咸火腿。塊魚焗得好香,魚皮亦都好乾身。但可惜D魚肉都煮到乾埋,食落覺得有D嚡。原本魚塊配上咸火腿味道可以好夾,但可惜塊魚比較乾,無乜肉汁,成道菜變得偏乾同咸。老實講,呢碟算係成晚最失色嘅一道菜。 |
|
*** Seafood Paella *** |
另外一碟主菜係西班牙海鮮飯。碟飯煮得好香,D飯味道好豐富、好入味,不過D飯同埋D海鮮都煮得乾咗D,如果唔係嘅話會更加好食。整體嚟講碟飯都算唔錯。 |
|
*** White Chocolate and Yogurt Soup with Red Berries Salad *** |
最後到個甜品,係一杯乳酪入面加咗幾款唔同嘅莓果,個賣相好靚。D乳酪比平時食開嗰D甜,無咁酸。配埋幾款莓果,味道好清新,幾啱我哋嘅口味。
食完甜品,飲埋餐茶,我哋呢餐平安夜晚餐就食完。今晚食物嘅水準好高,比我哋對上一次幫襯嘅更加出色。而個set dinner亦好啱我哋,一個套餐有齊我哋最想食嘅西班牙菜式,而每碟tapas嘅份量都細細份,好似tasting menu一樣。唯一美中不足嘅係今晚其中一個主菜焗鱸魚較為失色。
我哋對呢一餐飯好滿意,相信好快又會再返嚟幫襯呢間餐廳。 |
沒有留言:
發佈留言