K L S W 遊記: 夏之北海道(十二)

日期 ﹕七月十三日至十四日
行程 ﹕小樽 => 積丹

由富良野揸車到小樽要三個幾鐘，到嘅時候，已經近夜晚八點。去酒店check-in後，就即刻去食晚餐。早幾日跟團嘅時候，淨係夠時間試咗D小食同甜品。今次再返嚟，終於可以試下出名嘅壽司。小樽有一條壽司屋通，由多間壽司店組成，當中政壽司同旭壽司最出名。而我哋今次就揀咗後者。

一入到去，淨係得我哋一枱客，真係有D驚訝。其實夜晚嘅小樽同日頭見到嘅好唔同，街上面好少人，無乜遊客，好寧靜。

喺旭壽司度，我哋order咗一盤手握壽司同埋一碗海鮮丼。D食物嘅賣相好靚、好新鮮。個海鮮丼有好多材料，樣樣都好新鮮，當中海膽同魚子尤其好食。而個海膽，從顏色同味道，我哋認為應該唔係馬糞海膽，但都好好食。

個手握壽司一共有十二件，有大拖羅、三文魚、魚子、海膽、牡丹蝦、蟹柳、帶子等等。其實一直有個疑問，究竟手握壽司同普通壽司有幾大分別，會有幾好食，點解可以貴咁多，所以決定今次喺旭壽司一於試真佢。

結果，旭壽司嘅手握壽司果然好好食。D壽司材料固然係靚D、新鮮D。夾埋個壽司飯食，覺得配搭得好好。D壽司飯一放入口就自己散開，完全唔似食緊飯團。咁多件壽司當中，我覺得海膽、帶子同大拖羅最好食。

食完埋單先發現，原來旭壽司係九點鐘關門，並非旅遊書所寫嘅十點。我哋一出咗門口，老板娘立刻熄燈、關門。但當佢發現我哋仲喺門外影緊相，佢馬上將D燈着番，仲主動幫我哋影番張合照，真係好好人。
呢一餐，食物同服務都令我哋好滿意。

第二朝，我哋一早就向積丹出發。到積丹嘅主要目的，係要品嚐一下當地出產嘅新鮮海膽。由小樽揸車到積丹，要大約個半鐘時間。而我哋首先會到神威岬參觀，需要多三十分鐘嘅車程。落咗車，行五分鐘左右就到神威岬嘅入口。呢度有個牌寫住"女人禁地神威岬"。從前，呢度係神聖嘅地方，係禁止女性進入。由入口處一路行，要約廿分鐘至到最盡頭嘅神威岩。呢度環境唔錯，面對住270度一望無際嘅海，好舒服。可惜今日天陰，我哋無缘睇到號稱日本最藍嘅海水。