夏之北海道(十三) - 積丹海膽

日期 ﹕七月十四日
行程 ﹕積丹

跟住落嚟，就要到今日嘅主角，海膽飯。其實我哋揸四個鐘車來回積丹，就係為咗一試積丹出產嘅新鮮海膽。政府為咗確保海膽嘅數量，每年只准漁民於六至八月捕海膽。而呢幾個月又係馬糞海膽嘅產期，要食新鮮嘅馬糞海膽，就要襯呢個時候去。




其實積丹有幾間出名食海膽嘅食堂，我哋就揀咗呢間中村屋。

我哋嘅目標係佢一日限售5份嘅"鴛鴦"海膽飯。一客飯有齊新鮮嘅積丹產馬糞海膽同北紫海膽，十分吸引。

好! 個飯一送到嚟，我哋見到一個大飯碗上面，舖滿厚厚嘅海膽，十分壯觀。但老實講，D海膽嘅賣相，唔及早幾日喺札幌食嘅利尻馬糞海膽咁靚仔、整齊。但份量就多好多。

首先，我哋試咗北紫海膽先。一放入口，唔識講嘢，淨係覺得好好食、好感動。細心食真D，覺得口裏面嘅海膽好甘甜、好creamy、好好食。另外由於層海膽好厚，唔似得平時D海膽飯嗰層咁簿，D海膽無咁易受到白飯嘅温度影響而變熱。所以D海膽入口嘅時候，仍然係好冰凍，好好食。係食過最好食嘅海膽。其實好食嘅程度，同第二名都相距好遠吓。

跟住，我哋好心急試埋D馬糞海膽。一試落去，竟然明顯有分别，D馬糞海膽竟然可以明顯再好食D。唔係好識點講，只係覺得D馬糞海膽嘅味道係更濃郁，口感更實在，但仍然好creamy。如果唔係兩隻一齊試，真係未必識比較。

 

碗飯食到一半，唔記邊個提出先，話不如再叫多D海膽嚟食，原來我哋兩個都有咁嘅意思。於是，我哋決定再叫多一份淨馬糞海膽刺身試下。無叫到飯，係因為我哋馬上仲要返小樽試一間迴轉壽司，唔敢食得太飽。

 
個刺身用兩個貝類嘅殼裝住，望落都唔少。食落去都好好食，但感覺上都係跟飯食好食D。而且我哋覺得個鴛鴦海膽飯抵好多，佢淨係馬糞海膽嘅份量已經及得個刺身，仲要有埋同樣份量嘅北紫海膽，賣四千円認真超值。同樣嘅份量，相信喺香港用過千蚊都食唔到。最緊要嘅係，就算有咁嘅份量，我相信味道都唔會及得喺產地食不經加工嘅新鮮海膽味道。

之前喺和味無窮個節目睇到，"無添加"嘅海膽，係喺產地用當地嘅海水處理過，然後再排喺一塊塊板上面，包裝之後就可以運送。我諗係咁嘅原因，之前喺札幌食嘅無添加海膽，比積丹食嗰D靚仔好多。

呢餐我哋食得好感動，剛才食到嘅海膽飯，簡直係極品嘅味道。亦主要因為呢一餐，攪到我哋而家成日諗住返北海道。(當然，我哋都好掛住夕張蜜瓜同花咲蟹。)

之後，我哋就開始揸車返小樽。

上一篇 : 夏之北海道(十二) - 小樽/積丹
下一篇 : 夏之北海道(十四) - 小樽 (完)