夏之北海道(十四) - 小樽 (完)

日期 ﹕七月十四日至十五日
行程 ﹕=> 小樽 => 香港

食完美味嘅海膽，我哋就揸車返小樽。途中經過余市郡，路邊有好多車厘子直賣嘅攤檔，我哋本來就好鍾意食車厘子，所以買咗盒千幾円嘅佐籐錦車厘子嚟試下。我哋急不及待喺車上面開嚟食。雖然係貴D，但真係好好食，D味道爽口帶清甜，物有所值。




返到小樽，我哋就喺運河附近逛街，買吓嘢，食吓嘢。

晚上，我哋去咗出拔小路嘅一間天婦羅專門店食晚餐。間舖頭好細，只係可以坐到八個人左右。

我哋叫咗一個天婦羅定食同一份炸天婦羅。兩款天婦羅食物嘅材料有D唔同，總括有蝦、蟹鉗、賴尿蝦、魚同什菜。試咗第一口天婦羅，我哋兩個都即刻話好好食。天婦羅一D都唔油，外層好薄，但好爽脆。裏面嘅材料好新鮮，唔似係炸過嘅食物，真係好好食。當中最難忘嘅係賴尿蝦，味道好特別，好好食。雖然我哋已經有D飽，但都忍唔住再叫多一個天婦羅定食。

食完飯之後，我哋去咗睇運河嘅夜景，影吓相。

第二日，係我哋行程最後一日。一早就去咗三角市場食嘢，搵咗間網上有人介紹過嘅舖頭。叫咗八角魚刺身、帶子同海鮮飯。但結果令我哋好失望，淨係可以用好普通嚟形容，可以話係我哋成個旅程最差嘅一餐。

之後，我哋起程返札幌。只需個幾鐘嘅時間，我哋就到達機場附近。還完車之後，喺機場食個午餐，買吓嘢，就已經夠鐘上機。

就係咁，十二日嘅北海道行程完結。真係好唔捨得北海道，希望可以好快再嚟過﹗

上一篇 : 夏之北海道(十三) - 積丹海膽
下一個旅程 : 日本東北雪國之旅