日本東北雪國之旅 (零) - 序

剛剛去完日本東北返嚟。今次嘅旅程有十六日，好豐富，我哋玩得好盡興。上年夏天去北海道，令我哋最難忘嘅係D食物，其次就係薰衣草原。而今次冬天到日本東北，就各方面都好出色，行程包羅咗不同嘅元素，有風景雪景、美食、溫泉、滑雪、睇日出、冰上釣魚。仲有機會喺冰天雪地上揸咗八日車，真係另一種嘅體驗。

今次十六日嘅行程，時間上較為充裕，行程编排上面亦較有彈性。我哋可以好悠閒咁享受今次嘅旅程。

講番D行程，今次嘅景點方面，主要係去睇松島嘅眾小島、山寺嘅風景、藏王嘅樹冰、奥入瀨冬天嘅景色、函館嘅夜景，同埋岩手雪祭。我哋除咗覺得松島嘅景色普通咗D外，其他景點都令我哋好滿意。不過喺松島嘅遊覽船上，有得餵海鷗，算係補償番風景上面嘅失色。

食物方面，鎖定嘅目標有米沢牛、仙台牛舌、松島蠔、八户嘅自助燒海鮮、函館嘅北海道海鮮。而今次旅程裏面，藏王民宿提供嘅一泊二食，令到我哋十分驚喜。男主人煮嘅法國菜質素好高，而且每晚嘅菜色都唔同，令我哋享受咗三晚非常優質嘅法國私房菜。

住宿方面，日本嘅温泉旅館都比較貴，再加上超高嘅日元滙價，令到我哋揀温泉旅館嘅時候，實在係好肉赤。最終我哋揀咗四晚住温泉旅館，分別係南三陸、銀山温泉、乳頭温泉嘅鶴之湯同埋十和田湖。揀頭三間温泉係因為佢哋嘅名氣同埋優美嘅環境。而揀十和田湖就係因為順道同抵住。

滑雪方面，由於我哋兩個都係初學者，所以只係安排咗兩日嘅滑雪，試下日本嘅粉雪，過下癮。順便亦都可以欣賞藏王嘅樹冰同埋浸下藏王温泉。

天氣方面，雖然大部份日子都係零度或以下，但係整體都尚可以接受。(我老婆初初比較擔心，因為佢怕凍，但結果都算頂得住。)只係有幾個大風或者大雪嘅日子，就真係好惡頂，我哋著哂所有裝備再加暖包，都仲覺得好凍、頂唔順，要避一避。但總括成個旅程，天氣都配合得好好，去到主要嘅景點，天色都唔錯，等我哋可以睇到靚景、影多D相。

而今次旅程嘅交通安排，主要係用 Flexi 4-day JR East Pass 乘搭新幹線作長距離嘅接駁，另外分開三次租車，方便縣內嘅遊覽。而來回青森與函館，我哋就另外買火車票。

雖然之前嘅旅行已經租過好幾次車，但喺雪地上揸車始終係第一次，令我哋有D擔心。尤其係出發前發生咗港人北海道車禍，令我哋更加不安。所以行程上亦都作出小許嘅改動，減少行山路，同埋避免入黑揸車。另外，出發前亦都讀咗一D雪地揸車要留意嘅事項，希望一切順利啦。

好! 序就寫到呢度，想知詳情就留意之後嘅遊記啦......

(另外，想特別鳴謝我同事"雛菊"小姐，上次北海道同今次日本東北嘅行程，佢都俾咗好多資料同寶貴嘅意見，真係感激不盡!! 我祝佢再去多D日本，然後再過多D好料俾我。 :D )

上一個旅程 : 夏之北海道
下一篇 : 日本東北雪國之旅 (一) - 米沢