網頁

日本東北雪國之旅(三) - 仙台、南三陸

日期 : 一月廿四日及廿五日早上
天氣 : 天陰寒冷(廿四日)、天晴(廿五日)
行程 : 福島市 → 仙台 → 南三陸

今日行程嘅主打,係去我哋期待咗好耐嘅南三陸温泉酒店。由於福島市去南三陸嘅車程比較遠,我哋會喺仙台中途停留參觀同食午餐,然後再去南三陸。

由福島到仙台,主要係行高速公路,但仍然需要個幾鐘嘅車程。到咗之後,首先去參觀青葉城址。呢度係當年伊達政宗所建造嘅青葉城遺址,而城址上最出名嘅係一座伊達政宗騎馬雕像。




同鶴之城一樣,我哋都無入到個建築物參觀。淨係喺附近睇風景,由高處俯瞰仙台市嘅景色。睇咗無耐就走,因為實在太凍喇!



我哋跟住去咗仙台嘅一番町行咗一陣街,然後就去咗一間燒烤店食仙台牛。



一去到,老板娘就問我哋喺邊度嚟,之後就俾咗本新假期同埋飲食男女我哋睇,裏面有介紹佢哋舖頭嘅報導。雜誌話大部份仙台牛都送咗去物價水平較高嘅東京等地區,呢間舖頭係少數可以食到正宗本地仙台牛而價錢較相宜嘅地方。




其實我哋嚟之前,已經決定好要食佢嘅仙台牛特選牛肋骨肉。另外,我哋再order咗一客雜錦燒烤套餐試下。



個牛肋骨肉嘅size有一塊牛扒左右,送上枱已經切好咗方便我哋燒烤。而佢嘅賣相好靚、好吸引,好想即刻試下佢嘅味道。燒好之後咬落去,發現雖然塊牛都幾厚,但佢成件都好鬆軟,而且牛肉本身嘅味道唔錯,愈咬愈有味。


燒咗幾塊之後,覺得D牛燒得耐少少會比較好食。可能係塊牛肉嘅脂肪好平均,燒烤得耐都唔會韌,反而會好香口,好好食!


如果攞仙台牛同米沢牛比較,我哋都唔識得好實質咁比較,只係覺得米沢牛始終好食D。但係用米沢牛一半嘅價錢,就可以食到好食嘅仙台牛,我哋覺得好抵。

不過,食完仙台牛之後,反而令我哋更加掛住米沢牛......

跟住,我哋就起程向南三陸出發。段路有一半係行高速,一半行國道,需時約個半鐘。沿途都可以見到雪景。


大約係四點鐘左右,我哋到達南三陸觀洋酒店。喺counter check-in之後,就有個職員推住D行李帶我哋返房。經過酒店大堂嘅時候,見到全部窗都係落地大玻璃,望到無敵嘅太平洋海景。


返到上房,第一時間打開窗簾望出去,見到嘅係同大堂一樣,180度嘅大海景。雖然今日天色陰暗,海上面嘅色彩唔係好靚,但係呢個無遮擋嘅大海景實在太懾人,就咁齋坐望住都覺得好舒服!




抖咗一陣,我哋就拿拿淋咁走落去浸温泉,享受下一路浸一路睇咁靚嘅黃昏海洋景,我諗都無乜幾可。順道喺酒店周圍參觀咗一陣。





男湯有兩個,擁有無敵海景嘅喺二樓。裏面有一個室內風呂,同埋一個露天風呂。女湯嗰邊都係有兩個,二樓嗰個有一個室內同兩個露天,但係由二樓上四樓嘅樓梯就封咗冇得上去。

男湯個大浴場前面係落地大玻璃,我一邊浸住温泉,一邊欣賞到大平洋嘅靚景,好興奮。個海望落去好似望唔到盡頭,海面呈現一片淡淡嘅橙黄色,好壯觀!


浸咗一陣,我就走去試下個露天風呂。由室內走向室外,雖然只係一段好短嘅路,但係無著杉喺零度嘅環境下,的確係好鬼死凍。我完全感受到寒風刺骨嘅感覺,直頭係刺完肉再刺骨。

咁凍,我當然係用極速走落去個露天風呂度。但因為D水都幾熱,唔敢一下子就浸哂成個人落去,只係浸住半身先。個露天風呂唔係好大,但係佢嘅景觀比大浴場更靚、更開揚。喺黃昏嘅時刻,雖然睇唔到日落,但浸住温泉,望住廣闊嘅天空,眺望無際嘅海洋,真係好正、好舒服。


浸完温泉,我哋喺房間會合,稍作休息之後,就去享用今晚嘅晚餐。

一去到我哋個位,我哋兩人份嘅晚餐放滿咗成張四人size嘅枱,好多嘢食!攞起張餐單睇下,見佢仲長過平時去飲嗰張。心諗,一個人點食得哂一個餐呀!


呢一餐嘅食物有幾款精緻嘅前菜、湯、煮物、刺身、蒸蛋、松葉蟹,而成個餐嘅焦點,係個海膽飯,同埋原隻燒新鮮大鮑魚。




每一味菜色嘅味道都唔錯,D魚生好新鮮肥美,鮑魚好彈牙,海膽飯好入味。而嗰件蟹,原本無乜期望,但食落都幾鮮甜,比起上次北海道酒店自助餐食嗰啲好食好多。



食飯之後,仲有個甜品同一杯梅酒,呢餐真係好圓滿。

享受完咁豐富嘅晚餐之後,真係好飽。我哋走咗去酒店附設嘅手信舖行下,順便消下濟。之後就返房休息。


住温泉酒店,我哋鍾意揀tatami,覺得比洋式房更舒服。


今晚可能太早訓,去到半夜嘅時候就醒咗。走去窗邊望下窗外嘅景色,發現原來夜晚嘅景色都唔錯,見到好多星星,又隱約見到海面嘅景色,好寧靜、好舒服。睇咗一陣,就再訓過,準備迎接聽日嘅日出。



今日日出嘅時間係六點四十八分。一早較好咗六點半鬧鐘起身,見到今日個天色好好,應該可以睇到日出。


於是我哋放好張櫈,一齊坐喺窗前等待日出嘅來臨,登登登登......








個日出景同喺紅葉瀛風節目見到嘅一模一樣,真係好得。由於個眼前嘅景色太靚,我一路係咁影,影咗好多張,都唔識停手。

睇完日出之後,我哋發現窗外企咗幾隻海鷗,望住我哋,完全唔驚人,好似等緊我哋餵嘢食咁!



喺房睇完日出,我哋急急腳走落去浸多一次温泉,睇下清晨日出景。睇怕咁早就起身睇日出同浸溫泉都係只此一次!

今日天氣比琴日好好多,而且個温泉係向東,今朝早喺温泉欣賞到嘅景色,比起琴日黃昏,更有色彩、朝氣。


大多數人都好早嚟,浸住温泉睇日出,所以我落嚟嘅時候,其他人都開始離開。好快就淨番我一個人獨霸整個男湯。襯呢個機會,我即刻攞部DC出嚟,影下男湯嘅環境,同埋風景。(琴日都無機會攞部機出嚟影相,其實所有男湯嘅相都係今朝影嘅。)



浸完温泉,我哋就走去食早餐。原本見佢係自助餐,都預佢係啲好standard嘅嘢。不過,雖然D食物望落去無乜特別,但係食落去就有意外嘅驚喜。大部份嘅水準都唔錯,其中粟米湯、紫菜、蟹柳沙律、南瓜蓉都好好味,另外仲有仙台出名嘅燒魚餅。呢個自助早餐嘅水準,比起我哋以前食過嘅都要好!




食完之後,喺酒店行下,我哋就準備離開酒店,向下一站松島出發。


上一篇 : 日本東北雪國之旅(二) - 会津若松、豬苗代湖
下一篇 : 待續 ...

沒有留言: